Ояндаи наздик миёни гурӯҳҳои кории Тоҷикистону Қирғизистон барои баррасӣ ва мувофиқасозии матни лоиҳаи Шартнома миёни кишварҳо дар бораи марзи давлатӣ гуфтушунид сурат мегирад. Дар ин бора ба «Азия-Плюс» як манбаъ аз ҳукумати ҷумҳурӣ иттилоъ дод.
Ба иттилои манбаъ, гурӯҳҳои корӣ бояд лоиҳаи мувофиқашудаи Шартномаро то сафари расмии сарвари давлати кишвари ҳамсоя Алмазбек Отамбоев дар моҳи сентябр ба Душанбе омода кунанд.
«Дар вохӯрии гурӯҳи коршиносони Тоҷикистону Қирғизистон, ки имрӯз дар Қайроққум оғоз шуд, лоиҳаи созишномаи байниҳукуматӣ дар бораи истифодаи роҳҳои мошингарди наздимарзӣ таҳия мегардад, ки дар он муқаррарот ва меъёрҳои истиснокунандаи ҳама гуна монеъагузорӣ ва маҳдудиятҳо дар ҳаракати бемамониати нақлиёт, бор ва шаҳрвандони ҳарду кишвар пешбинӣ мешавад», – гуфт манбаъ.
Зимнан зикр гардид, ки тибқи мувофиқаи қаблан ҳосилшуда, 10-уми июл Тоҷикистону Қирғизистон дар як вақт сохтмон ва истифодаи минбаъдаи ду пул дар самти Исфараи марзи давлатӣ ва роҳҳои автомобилгарди наздики онро оғоз мекунанд.
