Шӯрои сиёсии Ҳизби наҳзати исломии Тоҷикистон ҷинояти зиддибашарии режими ишғолгари Исроил дар навори Ғаззаро маҳкум мекунад.
Дар изҳороти Шӯрои сиёсии ҲНИТ дар ин робита зикр мегардад, ки чанд рӯзи ахир ин режими ишғолгар ва таҷовузкор бо зери по гузоштани тамоми қонунҳои байналмилалӣ мардуми бедифоъи Фаластинро дар навори Ғазза аз замину осмон оташборон мекунад. «Ҳизби наҳзати исломии Тоҷикистон ин амалҳоро қотеъона маҳкум намуда, ҳимояти худро аз мардуми мазлуми Фаластин эълон менамояд», – омадааст дар изҳорот.
Гуфта мешавад, Шӯрои сиёсии ҲНИТ аз созмонҳои байналмилалӣ ва кишварҳои бонуфуз талаб менамояд, ки ҷиноёти режими таҷовузкори Исроилро маҳкум намуда, ҳуқуқи мардуми Фаластинро барои зиндагӣ дар сарзамин ва кишвари худ таъмин намоянд.
Аллакай муддати зиёда аз панҷ рӯз аст, ки нерӯҳои низомии Исроил ҳуҷуми худ ба мавқеъи ҷангиёни Фаластин дар навори Ғаззаро идома медиҳад. Бино ба маълумоти табибони фаластинӣ, шумори ҳалокшудагон аз ҷониби Фаластин бар асари ин даргирӣ ҳадди ақал ба 121 нафар расидааст.
