Дар дафтари кории Ҳаракати ҷамъиятии умумирусиягии «Муҳоҷирони меҳнатии тоҷик» дар шаҳри Маскав ва ҳамчунин манзили зист ва бӯстонсарои раиси ин ҳаракат Каромат Шарипов рӯзи 29-уми октябр кофтуков гузаронида шуд.
Дар торнамои расмии ҳаракат дар ин робита иттилоъ дода мешавад, ки сабаби бозҷӯӣ
рӯйдодҳои фоҷеабори рухдода
рӯзи 6-уми сентябри соли равон дар бозори «Садовод» аст, ки аз рӯйи ин далел парвандаи ҷиноятӣ боз шудааст.
Дар роҳандозии ин рӯйдодҳои фоҷеабор дар бозори «Садовод» роҳбари ҳаракат, ҳомии ҳуқуқ Каромат Шариповро гумонбар дониста, ӯ мутобиқи моддаи 179, қ. 1-и Кодекси ҷиноии Русия (маҷбур кардан ба муомилот (амал) айбдор карда мешавад.
Мафҳуми «муомилот» гӯё аз ҷониби К.Шарипов маҷбуран бо маблағи пулӣ ҷалб кардани муҳоҷирон ба амалҳои марбут ба ҳимояи ҳуқуқашон маънидод мешавад.
Дар иттилоъ таъкид мегардад, ки айни замон дар бозори «Садовод» беш аз 6 ҳазор нафар муҳоҷирон машғули кор буда, ҳамватанон ба К.Шарипов телефонӣ дар тамос мешаванд ва аз ӯ кумак мепурсанд.
Гуфта мешавад, кофтуков натанҳо дар дафтари корӣ, балки дар манзили зисти Каромат Шарипов ва бӯстонсарои ӯ низ гузаронида шуда, бозҷӯӣ тибқи маълумоти онҳо, бо айбдорӣ ба ифротгароӣ (экстремизм) сурат гирифтааст.
Ҳаракати «Муҳоҷирони меҳнатии тоҷик» ба ин амал эътироз оварда, бовар доранд, ки чорабиниҳои аз ҷониби мақомоти тафтишот ҷараёндошта дар робита ба рӯйдодҳо дар бозори «Садовод» ва тарзи баргузории онҳо гувоҳи онанд, ки К.Шарипов дар роҳи дуруст қарор дорад.
Иштирокчиёни Ҳаракати ҷамъиятии умумирусиягии «Муҳоҷирони меҳнатии тоҷик» тасмим гирифтанд, ки бо нома ба президенти Русия муроҷиат намуда, ҳамчунин бо иштироки намояндагони созмонҳои ҷамъиятии ҳомии ҳуқуқ, рӯзноманигорони тоҷик ва хориҷӣ оид ба рӯйдодҳо дар бозори «Садовод» нишасти хабарӣ баргузор мекунанд.
Зимнан зикр мегардад, ки айни замон пешвои ҳаракат Каромат Шарипов дар кумитаи тафтишоти пулис, воқеъ дар кӯчаи Сормови ноҳияи Вихино қарор дорад.
Қобили зикр аст, ки пас аз рӯйдодҳои фоҷеабор дар бозори «Садовод»-и шаҳри Маскав як гурӯҳи муҳоҷирони тоҷики машғули кор дар ин бозор зикр карданд, ки дар муноқишаву занозании рухдода миёни таксиронҳо роҳбари ҳаракати ҷамъиятии умумирусиягии «Муҳоҷирони меҳнатии тоҷик»
Каромат Шариповро гунаҳкор медонанд.
