Кормандони Агентии назорати маводи нашъаовари назди Президенти Ҷумҳурии Тоҷикистон дар натиҷаи як амалиёти бобарор ду нафар сокинони 18-солаи ноҳияи Ёвонро, ки мехостанд дар ҳудуди пойтахт маводи нашъаоварро фурӯшанд, дастгир намуданд.
Бино ба иттилои шуъбаи робита бо ҷомеаи Агентӣ, барои амалӣ намудани хабари оперативӣ, қарор қабул шуд, ки онҳоро бо далели шайъӣ дастгир намоянд.
Гуфта мешавад, фурӯхтани ин бори ҷиноӣ ва ба даст даровардани даромади муфт ба онҳо муяссар нагардида, дар вақти азназаргузаронии шахсӣ аз онҳо бастаи селофанӣ бо маводи растанимонанди буйи махсус дошта дарёфт ва мусодира гардид.
Лабораторияи ташхиси судӣ муайян кард, ки маводи мусодирашуда навъи ҳашиш аст. Аз рӯи ҳодисаи мазкур нисбати дастгиршудагон парвандаи ҷиноятӣ оғоз шудааст.
Онҳо ба тавқифгоҳи нигоҳдошти муваққатии Агентӣ ворид карда шуда, айни замон гурӯҳи тафтишотӣ-оперативии АНМН ҷиҳати муайян кардани дигар шахсони ба ин ҷиноят марбут чораҳои заруриро меандешад.
