Кормандони мақомоти милисаи шаҳри Турсунзода ба гумони даст доштан дар ҳамлаи ғоратгарона сокини 30-солаи ноҳияи Восеъ Тоҳир Каримов ва сокини 21-солаи шаҳри Ваҳдат Рамзатулло Амонуллоро ба ҳабс гирифтанд.
Бино ба иттилои маркази матбуоти ВКД Тоҷикистон, шаби 5 ба 6-уми ноябр дастгиршудагон ба автомашинаи тамғаи «Опел-Астра»-и мутааллиқ ба сокини 49-солаи ноҳияи Фархор Мӯсо Исоев нишаста, аз ӯ дархост мекунанд, ки онҳоро то шаҳри Турсунзода расонад.
Гуфта мешавад, дар қаламрави ноҳияи Ҳисор онҳо ронандаро мавриди лату кӯб қарор дода, сипас автомашинаи арзишаш 6 ҳазор 200 доллари ИМА-ро тасарруф ва аз ҷойи ҳодиса ғайб задаанд.
Зимнан зикр мегардад, ки аз рӯйи далели мазкур парвандаи ҷиноӣ боз гардида, тафтишот дар ин самт идома дорад.
