Дар доираи Рӯзҳои шаҳри Санкт-Петрбург дар Душанбе губернатори пойтахти шимолии Русия Георгий Полтавченко ва раиси шаҳри Душанбе Маҳмадсаид Убайдуллоев Ёддошти тафоҳум миёни шаҳрҳои Санкт-Петербург ва Душанбе оид ба ҳамкорӣ дар масъалаҳои муҳоҷирати кориро ба имзо расониданд.
Тавре котиби матбуотии раиси пойтахт Шавкат Саидов хабар дод, мутобиқи бандҳои санади баимзорасида, сафари муҳоҷирони корӣ аз пойтахти Тоҷикистон ба шаҳри Санкт-Петербург қонунӣ сурат гирифта, ҳуқуқ ва озодиҳои онҳо ҳимоя мешаванд.
«Корхонаву ташкилотҳои шаҳри Санкт-Петербург муҳоҷирони корӣ аз шаҳри Душанберо муташаккилона ва бо назардошти эҳтиёҷ ба кор ҷалб мекунанд», – иброз дошт Саидов.
Зимнан зикр гардид, ки ҳамчунин дар пойтахт байни мактаби таҳсилоти миёнаи умумии №92-и Душанбе ва мактаби таҳсилоти миёнаи умумии №261 -и ноҳияи Кирови Санкт-Петербург Созишномаи ҳамкорӣ ба имзо расонида шуд.
