Вазири маориф ва илми Тоҷикистон Нуриддин Саидов дар ҷамъи журналистон изҳор намуд, ки ниятҳои ректори Донишгоҳи давлатии омӯзгории Тоҷикистон Абдуҷаббор Раҳмонов оид ба ҷаримаи пулӣ бастани донишҷӯён барои ба дарсҳо ҳозир нашудан ғайриқонунӣ аст.
«Мутобиқи талаботи қонунгузорӣ, дар сурати 36 соат ба машғулиятҳо ҳозир нашудан донишҷӯ аз муассисаи таълимӣ хориҷ карда мешавад», – қайд кард вазир.
Ӯ ҳамчунин таъкид дошт, ки ба амалӣ шудани тасмими ректори Донишгоҳи омӯзгорӣ оид ба ҷарима бастани донишҷӯён ба маблағи 25 сомонӣ барои ҳозир нашудан ба як машғулият комилан роҳ нахоҳад дод.
Ёдрас мекунем, ки Абдуҷаббор Раҳмонов, ректори Донишгоҳи давлатии омӯзгории Тоҷикистон изҳор дошта буд, ки тасмим гирифтааст, барои донишҷӯёне, ки ба дарсҳо ҳозир намешаванд,
ҷаримаи пулӣ ҷорӣ созад.
