Аз 1-уми январи соли 2015 тарифҳои истифодаи оби нӯшокӣ дар шаҳри Душанбе боло мераванд. Бо пешниҳоди КВД «Обу корези Душанбе» Хадамоти зиддиинҳисории назди ҳукумати ҷумҳурӣ дар ин хусус қарор қабул кардааст.
Котиби матбуотии раиси пойтахт Шавкат Саидов ин қарорро чунин шарҳ дод: «Тарифҳо бо назардошти болоравии нархи истифодаи нерӯи барқ, реагентҳо барои поксозии об ва ҳамчунин бо мақсади баргардонидани қарзҳои Бонки ҷаҳонӣ, ки ҷиҳати амалисозии лоиҳаҳо оид ба обтаъминкунии пойтахт ҷудо шуда буданд, зиёд карда мешаванд».
Мутобиқи тарифҳои нав, ҳар як сокини пойтахт барои истифодаи об дар як моҳ ба ҷойи 3 сомониву 31 дирами пешина 4 сомониву 14 дирам маблағ пардохт мекунад. Барои ташкилотҳои буҷетӣ нархи 1 метри мукааби об 1 сомониву 18 дирам ва барои корхонаҳои тиҷоратӣ 2,95 сомониро ташкил хоҳад дод.
