Раиси шаҳри Душанбе Маҳмадсаид Убайдуллоев
Нақшаи чорабиниҳои
мақомоти шаҳрдории пойтахт оид ба таҷлили Рӯзи Парчами давлатии Тоҷикистон дар шаҳри Душанберо тасдиқ намуд.
Бино ба иттилои хадамоти матбуоти мақомоти шаҳрдории пойтахт, рӯзи душанбеи ҳафтаи оянда соати 17-00 дар майдони Парчами давлатии Тоҷикистон роҳпаймоии идонаи сокинони шаҳр доир мегардад, ки дар он беш аз 8 ҳазору 500 нафар ширкат меварзанд.
Ба иттилои манбаъ, онҳо дар чор ноҳияи пойтахт ҷамъ омада, сипас тариқи кӯчаҳои шаҳр то майдони Парчами давлатӣ (назди сутунпояи парчам) роҳпаймоӣ мекунанд ва дар ин ҷо консерти идонаи устодони санъати кишвар баргузор мегардад.
Ҳамчунин ба ифтихори таҷлили ҷашни Рӯзи Парчами давлатӣ дар пойтахт баргузории мизҳои гирд, конфронсҳо, намоишгоҳҳо ва дигар чорабиниҳо дар назар буда, тамоми кӯчаву хиёбонҳои шаҳр бо лавҳаву шиорҳои идона оро дода мешаванд. Ронандагони воситаҳои нақлиёти ҷамъиятӣ бо нишони сарисинагӣ – рамзи Парчами давлатии Тоҷикистон таъмин карда мешаванд.
