Мақомоти прокуратураи вилояти Хатлон маълумоти чанде қабл аз ҷониби маркази матбуоти ВКД интишоршуда оид ба
рабудани кӯдаки 1-моҳа
дар ноҳияи Қумсангир аз ҷониби шаҳрванди дар Маскав иқоматдошта Лидия Крутскаяро рад мекунад.
Сарёвари прокурори вилояти Хатлон Варқа Зайниддинов ба «Азия-Плюс» дар ин робита иттилоъ дод, ки Лидия Крутскаяи 30-сола модари кӯдаки «гӯё рабудашуда» буда, кӯдак на 1-моҳа, балки 9-моҳа аст.
«Волидони шавҳараш, ки ӯро моҳи май ба хизмати ҳарбӣ даъват карданд, арӯси руси аз Русия овардаи писарашонро аз хона ронда, ба ӯ имкон намедоданд, ки бо писарчааш дидор дошта бошад», – мегӯяд сарёвари прокурори вилоят. – Волидони шавҳараш ғайриқонунӣ ба вохӯрии модар бо фарзанди худ монеъ мешуданд, вале ӯ ба дидор бо фарзандаш дар ҳама гуна вақту ҳолат ҳуқуқ дорад. Зан маҷбур шудааст, ки пинҳонӣ ба хона ворид шуда, фарзандашро бо худ барад».
Варқа Зайниддинов ҳамчунин зикр кард, ки нисбати Л.Крутская парвандаи ҷиноӣ боз нашуда, ӯ ба ҳабс ҳам гирифта нашудааст ва айни замон бо фарзандаш назди шиносҳояш дар ноҳияи Рӯдакӣ қарор дорад.
