Чанде қабл таҳти раёсати раиси шаҳри Душанбе Маҳмадсаид Убайдуллоев бо иштироки муовинони раиси пойтахт, раисони ноҳияҳо, роҳбарони шабакаҳои барқу гармидиҳии шаҳри Душанбе машварати корӣ доир гардид, ки дар он масоили марбут ба сарфаҷӯии нерӯи барқ дар пойтахт, ба сарчашмаҳои алтернативии таъмини нерӯи барқ гузаштани иншооти саноатии ҷудогона баррасӣ шуданд.
Бино ба иттилои дафтари матбуоти мақомоти шаҳрдории пойтахт, Маҳмадсаид Убайдуллоев таъкид намудааст, ки баҳри коҳиш додани истифодабарии қувваи барқ дар ҳудуди шаҳри Душанбе, ки мутаассифона беш аз пеш ҳамарӯза аз меъёр зиёд гардида истодааст, бояд чораҳои мушаххас амалӣ шаванд, зеро нисбати 15-16 уми моҳи декабри соли 2013 дар 15-16 декабри соли равон истифодабарии шабонарӯзии қувваи барқ мутаносибан 18,9 ва 48,2 дар сад афзудааст, ки дар низоми маҳдудиятҳои интиқоли реҷавии барқ дар кишвар муросонопазир мебошад.
Гуфта мешавад, дар иртибот ба ин Маҳмадсаид Убайдуллоев муқаррар намуд, ки тавассути роҳандозии корҳои васеи таблиғотӣ миёни сокинон ва роҳбарони субъектҳои хоҷагидорӣ – муштариёни Шабакаҳои барқии шаҳр, даъват карда шавад, ки бо дарки масъулият нисбати истифодабарии нерӯи барқ муносибат намуда, беш аз ҳарвақта фарҳанги сарфаву сариштакорона истифода кардани онро дар коргоҳу ҷойи зист риоя созанд ва дар ин ҷода сохторҳои марбутаи соҳавиро вазифадор кард, ки тадбирҳои таъхирнопазир андешанд.
Зимнан зикр мегардад, ки раиси шаҳр ҳамзамон сохторҳои назорати давлатӣ ва комиссияҳои ҷамъиятиро муваззаф кард, ки бо роҳандозии рейдҳои муштараки доимӣ оид ба риояи ҳатмии ин муқаррарот аз ҷониби шахсони воқеию ҳуқуқӣ нисбати хилофрафторон тамоми тадбирҳои қатъии пешбининамудаи қонунгузориро татбиқ созанд.
