Бо мусоидати намояндагии Вазорати меҳнат, муҳоҷират ва шуғли аҳолии Тоҷикистон соли 2014 ба муҳоҷирони кори тоҷик дар Русия барои дастрас намудани беш аз 24 млн. рубли русӣ музди меҳнаташон кумак карда шуд. Дар ин бора зимни нишасти хабарӣ роҳбари ин вазорат Сумангул Тағойзода хабар дод.
Ӯ изҳор намуд, ки ҳамчунин 71 қарори судҳои ноҳиявии Русия нисбати шаҳрвандони Тоҷикистон ва таъиноти манъи вуруди 53 шаҳрвандони кишвар ба қаламрави Русия бекор карда шуда, истеҳслоти 68 парвандаи марбут ба қонушиканиҳои маъмурӣ боздошта шудааст. «Бо мусоидати намояндагии Вазорат 1 ҳазору 975 нафар шаҳрвандони Тоҷикистон бо ҷойҳои корӣ дар қаламрави Русия таъмин карда шуданд», – гуфт ӯ.
Бино ба маълумоти С.Тағойзода, бо мақсади сафарбарии муташаккили муҳоҷирон барои кор дар хориҷи кишвар, дар сохтори Вазорат Муассисаи дапвлатии «Агентии таъминот бо ҷойи корӣ дар хориҷи кишвар» таъсис дода шудааст. «Айни замон ин муассиса бо корхонаҳои Русия ва Қазоқистон ҳамкорӣ мекунад», – иброз дошт вазир.
Зимнан зикр гардид, ки феълан дар қаламрави Русия 82 ташкилотҳои ҷамъиятӣ, марказҳои фарҳангӣ ва ҷамъиятҳои диаспораи тоҷикон фаъолият мекунанд, ки Вазорат бо ҳамаи онҳо мудом дар робита аст.
