Вазорати наклиёти Тоҷикистон дар якҷоягӣ бо Вазорати маориф ва илми ҷумҳурӣ дар доираи Созишномаи ҳамкорӣ миёни ҳукуматҳои Тоҷикистону Русия барои таҳсили шаҳрвандони Тоҷикистон дар муассисаҳои таҳсилоти олии касбии ин кишвар дар соҳаи нақлиёт дар зинаҳои бакалавр, мутахассис, магистратура ва аспирантура 21 ҷойи буҷавӣ ҷудо намуда, озмун эълон менамояд.
Бино ба иттилои хадамоти матбуоти Вазорати нақлиёти ҶТ, барои таҳсил дар Русия бо ихтисоси техника ва технологияи сохтмон (мутахассис) – 5 ҷой, техника ва технологияи нақлиёти рӯизаминӣ (бакалавриат) – 6 ҷой, техника ва технологияи нақлиёти рӯизаминӣ (мутахассис) – 6 ҷой, техника ва технологияи нақлиёти рӯизаминӣ (магистратура) – 2 ҷой ва техника ва технологияи нақлиёти рӯизаминӣ (аспирантура) – 2 ҷой ҷудо карда шудааст.
Гуфта мешавад, қабули ҳуҷҷатҳои довталабон барои таҳсил дар муассисаҳои таҳсилоти олии касбии Русия то санаи 13-уми феврали соли 2015 идома меёбад.
