Корманди намояндагии Хадамоти муҳоҷирати Вазорати меҳнат, муҳоҷират ва шуғли аҳолии Тоҷикистон дар Русия ҳамроҳ бо раиси ташкилоти ҷамъиятии автономияи тоҷикони Ҷумҳурии Тотористон аз Маркази нигаҳдории муваққатии шаҳрвандони хориҷии шаҳри Қазони Русия боздид намуданд.
Котиби матбуоти намояндагии мақомоти муҳоҷирати ҶТ дар Русия Иброҳим Аҳмадов ба «Азия-Плюс» дар ин робита иттилоъ дод, ки зимни вохӯрӣ бо сардори маркази мазкур Руслан Садреев маълум шудааст, ки дар ин қабулгоҳ 20 нафар шаҳрвандони Тоҷикистон қарор доранд, ки бинобар сабаби қонуншиканиҳои маъмурӣ нисбаташон қарори хориҷ кардан аз Русия содир шудааст.
Ба иттилои манбаъ, корманди намояндагӣ ҳамчунин бо шаҳрвандони тоҷики дар ин қабулгоҳ қарордошта суҳбат ороста, аён шудааст, ки 4 нафари онҳо умуман ягон ҳуҷҷати тасдиқкунандаи шахсият надоранд ва расидани ҳуҷчатҳои зарурӣ аз хадамоти консулгарии сафорати Тоҷикистон дар Русияро мунтазиранд.
