Муовини нахуствазири Тоҷикистон Азим Иброҳим рӯзи 11-уми феврал аз майдони сохтмони нерӯгоҳи барқи обии «Роғун» боздид намуда, бо рафти корҳои сохтмону барқароркунӣ дар иншооти мазкури гидроэнергетикӣ шинос шуд.
Сармушовири хадамоти матбуоти президенти Тоҷикистон Субҳиддин Муҳиддинов ба «Азия-Плюс» дар ин робита иттилоъ дод, ки зимни вохӯрӣ бо раҳбарият ва бинокорони иншоот ба муовини нахуствазир маълумот дода шуд, ки корҳои сохтмону барқароркунӣ мутобиқи меъёрҳои ҷаҳонӣ ҷараён доранд.
«Зимни машварати корӣ бо иштироки коршиносону лоиҳакашон ва бинокорон Азим Иброҳим ба раҳбарияти ташкилоту идораҳои машғул ба кор дар иншоот ва шахсони масъул дастур дод, ки ба корҳои сохтмону барқароркунӣ дар нерӯгоҳи «Роғун» суръати бештар бахшида шавад», – қайд кард Муҳиддинов.
