Тибқи моддаи 27 Қонуни конститутсионии Ҷумҳурии Тоҷикистон «Дар бораи интихоботи вакилон ба Маҷлисҳои маҳаллии вакилони халқ» аз ҷониби комиссияҳои 70 ҳавзаи вилоятии интихобот бақайдгирии номзадҳои пешбаригардида ба вакилии Маҷлиси вакилони халқи вилояти Суғд, даъвати панҷум аз санаи 25 январи соли 2015 то санаи 9 феврали соли 2015 сурат гирифт.
Бино ба иттилои хадамоти матбуоти раиси вилоят, дар маҷмўъ, 182 нафар номзади пешбаригардида аз ҷониби комиссияҳои ҳавзавии интихобот оид ба интихоботи вакилон ба Маҷлиси вакилони халқи вилояти Суғд, даъвати панҷум ба қайд гирифта шуданд, ки 62 нафари онҳоро занҳо ташкил медиҳанд. Аз шумораи умумӣ 85 нафар номзаде, ки бо тариқи худпешбарӣ номзади худро гузошта буданд, ба қайди номзад ба вакилӣ гирифта шуда, 97 нафари номзадҳои (тавассути пленум ва конфронсҳо) бақайдгирифташударо номзади 7 ҳизбҳои сиёсии дар қаламрави вилоят фаъолият дошта ташкил медиҳад. Ба вакилии Маҷлиси вакилони халқи вилояти Суғд танҳо як ҳизби сиёсӣ – Ҳизби сотсиал-демократии Тоҷикистон номзадҳои худро пешбарӣ накардааст.
Аз шумораи умумии номзадҳои бақайдгирифташуда 159 нафарро тоҷикон ва 23 нафарро ўзбекон ташкил медиҳанд, аз рўи маълумот 168 нафар дорои маълумоти олӣ, 1 нафар олии нопурра, 5 нафар миёна ва 8 нафар миёнаи махсус, аз рўи синну сол то 35 сола-11 нафар, 35-40-сола – 19 нафар, 41-50-сола- 64 нафар, 51-60-сола – 80 нафар ва аз 60-сола боло – 8 нафар, аз рўи ихтисос бошад, 33 нафарро иқтисодчиён, 30 нафарро муҳандисон, 17 нафарро кишоварзон, 4 нафарро ҳуқуқшиносон, 58 нафарро омўзгорон, 16 нафарро табибон ва 24 нафарро номзадҳои дорои ихтисосҳои гуногун ташкил медиҳад.
Алҳол аз ҷониби комиссияҳои ҳавзавии вилоятии интихобот ба ҳамаи номзадҳои бақайдгирифташуда ботантана шаҳодатномаҳои номзадӣ ба вакилӣ супорида шуда, корҳои ташвиқотию тарғиботии номзадҳо ба вакилӣ ва барномаҳои пешазинтихоботии онҳо ҷараён дорад.
