Дар шаҳри Конибодом рӯзи 2 март кормандони милитсия зимни гузаронидани чорабиниҳои оперативӣ-ҷустуҷӯӣ ноболиғ И.У.-17-сола, хонандаи яке аз мактабҳои таҳсилоти умумиро бо гумони тамаъҷӯӣ дастгир намуданд.
Бино ба иттилои маркази матбуоти ВКД ҶТ, муайян карда шудааст, ки ӯ соли 2014 бо духтари ноболиғ Н.П. соли таваллудаш 2000, хонандаи ҳамон мактаб шиносоӣ пайдо намуда, акси муқаррарии ӯро ба телефони мобилиаш сабт мекунад.
Баъди чанде, аз сабаби пайдо гардидани муносибатҳои оштинопазирӣ байни онҳо, И.У. расми духтаракро тариқи барномаи “Фотошоп” бо тани аз миён боло пурра урён сохта, бо роҳи тамаъҷӯӣ аз ӯ таҳдид мекунад, ки дар ҳолати надодани маблағи пулии муайян, акси нимбараҳнаи ноболиғ Н.П.-ро ба воситаи шабакаи интернетӣ паҳн намуда, ӯро бадном месозад.
Санаи 14.02.с.2015 ноболиғ Н.П. дар ҳудуди мактаб ба ноболиғ И.У. ба воситаи рафиқаш маблағи 100 сомониро додааст. И.У. бошад, рӯзи 19.02.с.2015 аксҳои мазкурро ба телефони мобилии ҳамсинфаш ноболиғ Ҳ.М. соли таваллудаш 1998, ирсол намудааст, ки минбаъд он паҳн мегардад.
Баъди воқиф гаштан аз ҳодиса, модари ноболиғ Н.П. ба мақомоти милитсия муроҷиат мекунад. Нисбати далели мазкур парвандаи ҷиноятӣ оғоз гардида, тафтишот дар ин самт идома дорад.
