Муовини аввали раиси Ҳизби халқии демократии Тоҷикистон (ҲХДТ) Саидмурод Фаттоҳзода рӯзи 30 март дар дафтари марказии кории ҳизб бо сафири Чин дар Тоҷикистон Фан Сянжун мулоқот орост.
Сухангӯи ҲХДТ Усмон Солиев ба «Азия-Плюс» дар ин робита иттилоъ дод, ки сафир ҳамсуҳбати худрол бо пирӯзӣ дар интихоботи доиргардида ба парлумон ва маҷлисҳои маҳаллӣ табрик гуфта, қайд кардааст, ки ғалабаи мазкур аз нуфузи баланди ҳизб дар ҷомеа ва ташкили дурусти муборизаи пешазинтихоботӣ шаҳодат медиҳад.
«Ҷонибҳо ҳамчунин масъалаҳои густариши ҳарчи бештари ҳамкориҳо миёни Ҳизби коммунисти Чин ва ҲХДТ ва табодули таҷриба миёни ҳизбҳои ҳокими ду кишвари ҳамсояро низ баррасӣ намуданд», – гуфт Солиев.
Зимнан зикр гардид, ки дар ҷараёни вохӯрӣ ҳамчунин атрофи масоили таъмини амният дар минтақа ва амалисозии лоиҳаҳо баҳри рушди ҳамкориҳои дуҷониба табодули назари судманд сурат гирифт.
