Имрӯз Президенти кишвар Эмомалӣ Раҳмон узви Бюрои сиёсии Кумитаи марказии Ҳизби коммунисти Чин, котиби Кумитаи ҳизбӣ-роҳбари Ноҳияи Мухтори Синзян-Уйғури Ҷумҳурии Мардумии Чин Чжан Чунсянро ба ҳузур пазируфт.
Бино ба иттилои хадамоти матбуоти сарвари давлат, дар мулоқот масоили ҳамкории Тоҷикистон бо ин минтақаи фарохи Чин, ки дар ҳамсоягии кишвари мо қарор дорад, баррасӣ шуда,Чжан Чунсян аз боздиди худ аз корхонаю муассисаҳои муштараки ду кишвар дар ҷануб ва шимоли Тоҷикистон гузориш дод ва аз суръат ва сифати кори пурсамари онҳо изҳори хушҳолӣ кард.
Сарвари давлати Тоҷикистон аз сатҳ ва муҳтавои муносиботи кунунии Тоҷикистону Чин изҳори қаноатмандӣ карда, ҳамзамон изҳор дошт:”Мо азм дорем, ки ба муносиботи дӯстӣ ва ҳамкории судбахши худ бо Чин суръати бештар бахшида, онро ба сатҳи сифатан боло барорем”.
Барои ин бо сифати баланд таҳия намудани Барномаи нави ҳамкории Тоҷикистон бо Ноҳияи Мухтори Синзян-Уйғури Ҷумҳурии Мардумии Чин зарур шумурда шуд, зеро муҳлати барномаи амалкунанда имсол ба анҷом мерасад.
Бо қаноатмандӣ зикр гардид, ки саҳми Ноҳияи Мухтори Синзян-Уйғур дар ҳаҷми гардиши моли миёни Тоҷикистону Чин 78%-ро ташкил медиҳад.
Ба нақши гузаргоҳи сарҳадии Кулма-Қаросу ҳам баҳои баланд дода шуд, зеро ҳаҷми боркашонӣ аз ин роҳ тайи 10 соли охир 35 баробар афзуда, ба ҳаҷми боркашониҳои хориҷии роҳи оҳани Тоҷикистон баробар шудааст.
Дар робита ба ин тамоюл зарурати навсозии роҳи мошингарди Хоруғ-Кулма ба миён гузошта шуда, ҳамчунин доир ба густариши ҳамкорӣ дар соҳаҳои саноат, энергетика, кишоварзӣ, маориф ва илму фарҳанг гуфтугӯйи судбахш сурат гирифт.
