Давоми 10 рӯзи аввали баъди манъи фаъолияти нуқтаҳои мубодилаи асъори хусусӣ (саррофиҳо) дар кишвар, қурби арзи миллии Тоҷикистон нисбати доллари ИМА тақрибан 3% поин рафт.
Бино ба маълумоти Бонки миллии Тоҷикистон(БМТ), қурбҳои миёнаи хариду фурӯши нақди доллари ИМА имрӯз, 28 апрел дар ҷумҳурӣ 6,5000-6,5200 сомонӣ ва дар пойтахт – 6,5200-6,5400 сомонӣ барои 1 доллари ИМА-ро ташкил медиҳанд.
Ёдрас мекунем, ки бо қарори БМТ, аз 17 апрели соли равон фаъолияти нуқтаҳои мубодилаи асъори шахсони воқеӣ (хусусӣ) дар Тоҷикистон
боздошта шуд.
Қурбҳои миёнаи хариду фурӯши нақди доллари ИМА дар ҷумҳурӣ 6,3300-6,3500 сомониро ташкил дода буданд.
Манъи фаъолияти нуқтаҳои мубодилаи асъори хусусиро он замон дар БМТ чунин шарҳ дода буданд, ки «ин иқдом ба хотири таъмини устувории бозори дохилии асъори кишвар ва устувории қурби арзи миллӣ роҳандозӣ мешавад».
Дар ҳамин ҳол, собиқ моликони дӯконҳои саррофии хусусӣ ба аз ҷониби БМТ устувор гардонидани қурби асъор тариқи боздошти фаъолияти онҳо
сахт шубҳа доранд.
