Дар ҳошияи сафари корӣ ба вилояти Суғд сафири Ҷопон дар Тоҷикистон Такаши Камада аз шаҳри Исфара боздид кард.
Сухангӯи раиси шаҳри Исфара Иқбол Тешаев ба «Азия-Плюс» дар ин робита иттилоъ дод, ки ҳадаф аз сафари мазкур тақдими таҷҳизот ба муассисаҳои бахши маорифи шаҳр буда, бо ин мақсад сафир ба мактаби таҳсилоти миёнаи умумии №5 ташриф овард.
Дар вохӯрӣ бо ҳайати омӯзгорони мактаб раиси шаҳри Исфара Даврон Зоҳидзода қайд кард, ки тайи 14 соли ахир бо мусоидати сафорати Ҷопон заминаи моддиву техникии муассисаҳои таълимии шаҳр, аз ҷумла мактабҳои №№7, 16, 49 ва 65 хеле беҳтар шуданд.
Сафири Ҷопон дар ин робита изҳор намуд, ки дар чаҳорчӯби амалисозии лоиҳаи навбатӣ 7 мактаби шаҳри Исфара ба маблағи умумии 88 ҳазор доллари ИМа бо мебел ва тахтаҳои синфӣ муҷаҳҳаз карда мешаванд.
Ба мактабҳои №№5 ва 69-и шаҳр, №38-и ҷамоати Чилгазӣ, №№ 44 ва 46-и ҷамоати Хонобод, №49-и ҷамоати Чоркӯҳ ва №54-и ҷамоати Лаккон дар маҷмӯъ 1001 ҷуфт мизу курсӣ ва ҳамчунин 57 адад тахтаҳои синфӣ тақдим карда шуданд.
Зимни мулоқот бо раиси шаҳри Исфара дипломат зикр кард, ки сафорати Ҷопон дар Тоҷикистон минбаъд низ ба таҳкими заминаи моддиву техникии муассисаҳои бахшҳои маориф ва тандурустии Тоҷикистон кумаку мусоидат хоҳад кард.
