Дар Агентии назорати маводи нашъаовари назди президенти ҶТ рӯзи 19 май таҳти раёсати муовини аввали директори Агентӣ, роҳбари Ситоди кории ҷумҳуриявӣ полковник Зафар Самадов ҷаласаи якуми Ситоди амалиёти “Кӯкнор-2015” баргузор гардид.
Бино ба иттилои шуъбаи робита бо ҷомеаи Агентӣ, дар ҷаласа масъалаҳои ташкилӣ оид ба гузаронидани амалиёти “Кӯкнор-2015”, инчунин ҳамкории вазорату идораҳои дахлдор баррасӣ гардида, нақшаи гузаронидани чорабинӣ оид ба гузаронидани амалиёти “Кӯкнор-2015 тасдиқ гардид.
Зикр мегардад, ки дар кори ҷаласа намояндагони Шӯрои амнияти ҶТ, ВКД, КДАМ, Хадамоти гумруки назди Ҳукумати ҶТ, вазорату идораҳои дахлдор иштирок намуданд.
Гуфта мешавад, дар доираи амалиёти «Кӯкнор-2015» гузаронидани амалиёти байналмилалии СААД “Гром-2015” низ дар назар аст.
Қайд мешавад, ки барои гузаронидан, назорат кардан ва ҳамоҳанг сохтани фаъолияти мақомоти ҳифзи ҳуқуқ, сохторҳои қудратӣ ва ҳокимияти маҳаллӣ дар шаҳри Душанбе, ВМКБ, вилоятҳо ва шаҳру ноҳияҳо ситодҳои корӣ ташкил гардидаанд.
Қобили зикр аст, ки амалиёти «Кӯкнор» дар қаламрави Ҷумҳурии Тоҷикистон ҳамасола дар ду марҳила – аз 20 май то 31 август ва аз 1 сентябр то 30 ноябр гузаронида мешавад.
