Орзуи ба ҳаҷ рафтани собиқадори 94-солаи Ҷанги Бзуруги Ватанӣ (ҶБВ) Карим Қурбонов алҳол амалиношуда боқӣ мемонад.
Файзалӣ Қурбонов писари собиқадори ҷанг ба «Азия-Плюс» дар ин робита изҳор намуд, ки аз муроҷиат тариқи ВАО ба президенти мамлакат ҷиҳати мусоидат ба падараш барои адои маросими ҳаҷ алҳол ҳеҷ муроде ҳосил нашудааст.
«Як моҳ қабл мо ба сомонаи президенти кишвар Эмомалӣ Раҳмон мактуб навишта, дархост кардем, ки барои ба ҳаҷ сафарбар шудани падарам мусоидат намоянд, вале то ҳол посухе нагирифтаем», – мегӯяд Файзалӣ Қурбонов.
Ба гуфтаи ӯ, сарфи назар аз пиронсолӣ, вазъи солимии падараш хуб аст ва ӯ барои сафар ба макони муқаддаси Ислом омода аст. «Мо умедворем, ки президент ба дархости мо расидагӣ мекунад», – изҳори умедворӣ кард Ф.Қурбонов.
Ёдрас мекунем, ки мӯйсафеди 94-сола, собиқадори ҷанг, маъюби дараҷаи II Карим Қурбонов ва писари ӯ Файзалӣ Қурбонов рӯзи 15 апрел ба идораи «Азия-Плюс» омада, изҳор дошта буданд, ки
кӯшишҳои онҳо барои ба ҳаҷ сафарбар намудани муйсафед
бенатиҷа анҷом ёфтааст.
