Корманди комиссариати ҳарбии шаҳри Исфара ҳангоми порагирӣ дастгир шуд.
Аз маркази матбуоти Раёсати ВКД Тоҷикистон дар вилояти Суғд ба «Азия-Плюс» дар ин робита иттилоъ доданд, ки корманди 52-солаи комиссариат С.О. ҳангоми порагирӣ дар ҳаҷми 500 доллари ИМА бо далели шайъӣаз ҷониби кормандони шуъбаи умури дохилаи шаҳри Исфара боздошт шудааст. «Ин маблағро ӯ барои додани билети ҳарбӣ аз як сокини маҳаллӣ талаб кардааст», – гуфт манбаъ.
Ба иттилои манбаъ, аз рӯйи ин далел мутобиқи моддаи 319-и Кодекси ҷиноии ҶТ (Гирифтани пора аз ҷониби шахси мансабдор шахсан ё ба воситаи миёнарав) парвандаи ҷиноӣ боз шуда, тафтишот дар ин самт идома дорад.
Тибқи маълумоти Раёсати Агентии назорати давлатии молиявӣ ва мубориза бо коррупсияи ҶТ дар вилояти Суғд, аз оғози соли равон дар қаламрави минтақаи шимоли кишвар 29 (ҳамин давраи соли 2014 – 18 далел) далели гирифтани пора аз ҷониби шахсони мансабдор ба қайд гирифта шудааст.
