Раиси палатаи поёнии парлумони ҷумҳурӣ Шукурҷон Зуҳуров рӯзи 30 июн назди вакилон аз кори иҷрошуда дар иҷлосияи якуми Маҷлиси намояндагони Маҷлиси Олии ҶТ маълумот медиҳад.
Котиби матбуотии палатаи поёнии парлумон Муҳаммадато Султонов ба «Азия-Плюс» дар ин робита иттилоъ дод, ки бо ин ҳисоботи Шукурҷон Зуҳуров кори иҷлосияи якуми даъвати панҷуми парлумон ба итмом расида, вакилон ба таътили семоҳа мебароянд.
«Дар ҷаласаи рӯзи 30 июн ба ҷуз ҳисоботи Ш.Зуҳуров, ҳамчунин баррасии масъалаи марбут ба тасдиқи Созишнома миёни ҳукумати Тоҷикистон ва ҳукумати Иёлоти Муттаҳидаи Амрико дар бораи андозбандии кормандони маҳаллии сафорати ин кишвар дар Душанбе низ дар назар аст», – қайд кард Султонов.
