Дар робита ба гармои шадид, ки тайи рӯзҳои ахир дар қаламрави Тоҷикистон ҳукмфаром аст, мақомоти шаҳрдории Хуҷанд як қатор тадибрҳо рӯйи даст гирифт.
Дафтари матбуоти шаҳрдории Хуҷанд дар ин маврид иттилоъ медиҳад, тибқи дастури раиси шаҳр Раҷаббой Аҳмадзода тамоми марказхои саломатӣ, беморхонаҳо ва муассисахои иҷтимоӣ чораҳои пешгирӣ намудани аз нури офтоб зарар дидани сокинонро андешидаанд.
Гуфта мешавад, ба роҳбарони кӯдакистонҳо дастур дода шудааст, дар соатҳои қиёми офтоб ва гармӣ ба ҳарорати ҳавои хонаю ҳуҷраҳои онҳо эътибори ҷиддӣ дода, соати машғулиятҳои кӯдаконро тибқи нишондоди духтурон тартиб диҳанд. Ҳамчунин тариқи расонаҳои иттилоотӣ баромади мутахассисон ва духтурон ташкил карда шуда сокинонро доири талаботи санитарӣ ва сиҳатии бошандагони шаҳр дар ин рӯзҳои гармои бесобиқа огоҳ менамоянд.
Зикр мегардад, ки раиси шаҳр ба идораҳои таъминоти об ва фаъолияти ташноб, муассисаи нақлиёти сантирӣ, идораи таъмини фаъолияти фаввораҳо супориши қатъӣ дод, ки таъминоти шабонарӯзии сокиноро бо об сари вакт кашондани партов ва фаъолияти фаввораҳоро таъмин ва назорат намоянд. Дар маркази вилоят алҳол 13 фаввораҳои доимоамалкунанда ҳусни шаҳрро зеб медиҳанд.
