Корхонаи воҳиди давлатии «Хоҷагии манзилию коммуналӣ» арзиши об барои истеъмолгарон дар кишварро қариб ба андозаи 38% боло бурданист.
Директори корхона Алимурод Исломзода зимни нишасти хабарии имрӯза дар ин робита изҳор намуд, ки давоми сол арзиши об тақрибан 30 дирам барои 1 метри мураббаъ зиёд мешавад. Ӯ қайд кард, ки айни замон истеъмолгарони корхона барои истифодаи 1 метри мукааби об 80 дирам пардохт мекунанд. «Ҳамин тариқ, мо ният дорем, ки барои 1 метри мукааби об 1,10 дирам пардохтпулӣ муқаррар кунем», – таъкид дошт вай.
Ба қавли А.Исломзода, ин тасмим бинобар сабаби беқурбшавии пули миллӣ нисбати доллари ИМА рӯйи даст гирифта мешавад. Номбурда зикр кард, ки имрӯз корхона дар ин самт бо зиёнҳои зиёде барои худ кор мекунад. «Айни замон мо барои 1 метри мукааби об 80 дирам маблағ мегирем, зиёни мо бошад, 1,2 сомониро ташкил медиҳад», – афзуд роҳбари корхона.
Қобили зикр аст, ки фаъолияти КВД «Хоҷагии манзилибю коммуналӣ» ба хизматрасониҳо дар самти обтаъминкунӣ дар саросари ҷумҳурӣ нигаронида шудаааст. Дар пойтахти кишвар ин хизматрасониҳо ба зиммаи корхонаи тобеъ ба мақомоти ҳокимияти маҳаллӣ – КВД «Обу корехи Душанбе» вогузор шудааст.
