Шабонарӯзи гузашта дар натиҷаи гузаронидани амалиёти оперативӣ-ҷустуҷӯӣ аз тарафи кормандони Агентии назорати маводи нашъаовар (АНМН)-и назди Президенти Ҷумҳурии Тоҷикистон дар ноҳияи Шаҳристони вилояти Суғд автомашинаи тамғаи «Тойота-Прадо» боздошт гардид.
Тавре аз шуъбаи робита бо ҷомеаи Агентӣ хабар доданд, ҳангоми азназаргузаронии автомашина аз махфигоҳ дар дохили чархи эҳтиётӣ 7 баста бо маводи хокистарранг бо бӯи махсус ошкор гардид.
Мутобиқи хулосаи Шуъбаи ташхиси криминалистӣ, маводи мусодирашуда героин буда, вазни он 7 кг 116 грамро ташкил менамояд.
Тавре тафтишоти пешакӣ нишон дод, ронандаи автомашина, сокини 53-солаи пойтахт ният дошт героинро берун аз ҳудуди ҷумҳурӣ интиқол диҳад. Ҳоло чораҳои зарурӣ барои муайян ва дастгир намудани аъзоҳои боқимондаи гурӯҳи ҷиноятпеша андешида шудаанд.
Инчунин, кормандони Агентӣ дар канори шаҳри Душанбе сокини 39-солаи пойтахтро дастгир намуданд. Ҳангоми азназаргузаронии сумкаи варзишӣ, ки номбурда дар даст дошт, аз дохили он 15 баста бо маводи сабзранг ошкор гардид.
Тавре мутахассисони Шуъбаи экспертизаи судии Агентӣ муайян намуданд, маводи мусодирагардида гашиш буда, вазни он 18 кг 130 грамро ташкил дод.
Аз тарафи гурӯҳи оперативӣ-тафтишотӣ ҳамиштирокчиёни ҷиноят муайян шуда истодаанд.
Вазни умумии маводи нашъаовари мусодирашуда 25 кг 246 гр. мебошад.
Аз рӯи ҳодисаҳои номбаршуда аз тарафи Шуъбаи тафтишоти Агентӣ парвандаи ҷиноӣ бо моддаи 200 қ.4 КҶ ҶТ «Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори махсусан калон» оғоз гардидааст ва тафтишот давом дорад.
Боздоштшудагон ба Тавқифгоҳи нигоҳдории муваққатии Агентӣ ворид карда шуданд.
