Суди олии Тоҷикистон ҳукми рӯзи 30 апрел содиршуда аз ҷониби суди вилояти Хатлон нисбати директори бозори «Ином»-и ноҳияи Шаҳритӯс Бурҳон Абдуллоевро, ки дар робита ба муноқишааш бо додарарӯси президент Муҳибулло Саъдуллоев дар расонаҳо маъруф шуд, бетағйир боқӣ гузошт. Он замон ӯ ба 3 соли зиндони низоми умумӣ маҳкум гардида буд.
Раҳматилло Зойиров, адвокати Б.Абдуллоев ба «Азия-Плюс» дар ин робита изҳор намуд, ки зимни пешниҳоди аризаи кассатсионӣ ба Суди олӣ адвокатҳо дархост намуда буданд, ки ба мурофиаи судӣ худи Муҳибулло Саъдуллоев даъват карда шавад, вале Суди олӣ даъвати ӯро зарур нашуморид.
Қобили зикр аст, ки Б.Абдуллоев дар содир намудани ҷиноятҳо мутобиқи модадҳои 32, қ. 3 (Тайёрӣ ба ҷиноят ва суиқасд ба ҷиноят) ва 255, қ. 2 (Барқасдона ноюуд кардан ё зара расонидан ба амвол тариқи сӯзонидан)-и Кодекси ҷиноии ҶТ гунаҳкор дониста шуда, ба муҳлати 3 сол аз озодӣ маҳрум карда шуд.
Санавбар Абдуллоева, ҳамсари Бурҳон Абдуллоев қаблан ба «Азия-Плюс»
дар ин робита иттилоъ дода буд
, ки аз 19-уми декабри соли 2014 ҳамсари ӯ дар Раёсати ВКД Хатлон қарор дошта, ӯ гӯё ба «фармоиш» додани оташзании бозори «Ином» ба ду ҷавон, ки минбаъд бо далели шайъӣ – шишаҳои бензин боздошт шудаанд, гумонбар дониста мешавад. «Ҳамсари маро дидаву дониста боздошт карданд, то ки мо бобати қарори беадолатонаи суд дигар ба ҳеҷ куҷо муроҷиат накарда, саҳми худро дар бозор талаб накунем», – гуфт ӯ.
Ҳамчунин пештар ӯ бо мактуби кушод ба раиси шаҳри Душанбе Маҳмадсаид Убайдуллоев муроҷиат карда, дархост намуда буд, ки дар робита ба ғасби ғайриқонунии бозори «Ином» адолатро барқарор намуда, барои ин комиссияи махсус таъсис дода шавад. Абдуллоева умедвор буд, ки бо ёрии комиссия саҳмияҳои бозор баробар миёни оилаҳои Абдуллоевҳо ва Саъдуллоевҳо тақсим карда мешавад.
