Тавсияҳои чанде қабл расида аз Дафтари институтҳои демократӣ ва ҳуқуқи башари Созмони Амният ва Ҳамкорӣ дар Аврупо (ДИДҲБ/САҲА) аз рӯи натиҷаҳои интихоботи парлумонии 1 мартро ҳукумати Тоҷикистон барои омӯзишу омода кардани ҷавобҳо ба Прокуратураи генералӣ, Суди олӣ, Вазорати корҳои хориҷӣ, Вазорати адлия ва Комиссияи марказии интихобот ва раъйпурсӣ (КМИР)-и Тоҷикистон фиристод.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки ҳукумат ба КМИР дастур додааст, ки дар сурати зарурат барои омода кардани посухҳо ба ДИДҲБ/САҲА кормандони дигар вазорату идораҳо низ ҷалб карда шаванд. «Посухҳои ҷамъбастшуда аз ҷониби гурӯҳи кории дар назди КМИР таъсисёфта омода карда мешавад», – қайд кард Додозода.
Қаблан дар мусоҳиба ба «Азия-Плюс» Додозода дар ин робита изҳор намуда буд, ки ДИДҲБ/САҲА ба Тоҷикистон ҳамагӣ 31 тавсия ирсол намудааст, ки ба корҳои ташкилу баргузории интихобот, бақайдгирии интихобкунандагон ва номзадҳо ба вакилӣ, кор бо ВАО, санҷиши донистани забони давлатӣ аз номзадҳо, нозирони миллӣ аз аҳзоби сиёсӣ ва ҷомеаи шаҳрвандии кишвар марбут аст.
Намояндаи КМИР Тоҷикистон таъкид дошт, ки баъзе тавсияҳои ин ниҳод умуман ба меъёрҳои Конститутсияи ҷумҳурӣ мутобиқат намекунанд.
«Масалан, ба мо тавсия медиҳанд, ки ба овоздиҳӣ ба интихобот маҳкумшудагон барои содир намудани ҷиноятҳо роҳ дода шаванд, ки тибқи Конститутсияи Тоҷикистон манъ аст ё тавсияҳои ДИДҲБ/САҲА дар бораи ба раъйдиҳанда додани ҳуқуқи дар як вақт овоз додан ба якчанд номзадҳо ба вакилӣ, ки ба усули «як интихобкунанда – як овоз» созгор нест», – таъкид дошта буд намояндаи КМИР.
Ба гуфтаи ӯ, бо тавсияи ДИДҲБ/САҲА дар интихоботи гузашта муҳлати бозхонди номзадҳо ба вакилӣ аз интихобот дақиқан – 7 рӯз муқаррар шуда буд. «Акнун ба мо тавсия медиҳанд, ки ин муҳлатро то 10 рӯз, яъне то санаи омода шудани варақаҳои раъйдиҳӣ дароз кунем. ДИДҲБ/САҲА ҳамчунин тавсия медиҳад, ки иштироки нозирон аз аҳзоби сиёсии кишвар ва ҷомеаи шаҳрвандӣ дар кори комисияҳои интихоботии қитъавӣ таъмин карда шавад, ки тибқи қонунгузории кишвар манъ нашудааст», – афзуд Додозода.
