Рӯзи 5 август дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 30-солаи сокини шаҳри Душанбе бо гумони муомилоти ғайриқонунӣ бо асъори хориҷӣ дастгир карда шуд.
Дафтари матбуоти ВКД Тоҷикистон дар шарҳи ин ҳодиса менависад, гумонбаршуда аз моҳи май то инҷониб дар нуқтаи мубодилаи асъор, воқеъ дар бозори “Корвон”, ҳамчун хазинадор ғайриқонунӣ ба фаъолияти соҳибкорӣ, бидуни бақайдгирӣ ва иҷозатномаи махсус ба муомилоти ғайриқонунӣ бо асъори хориҷӣ ба миқдори калон машғул шудааст.
Гуфта мешавад, инчунин гумонбаршуда барои анҷом додани амалиёти ҳаррӯзааш аз бонк 50000-сомонӣ гирифта, бо ин қонеъ нашуда аз ҳисоби маблағҳои шахсии худ 31815-доллари ИМА, 1477800-рубли ФР, 8000-Эвро, 582-юани ҶХХ ва 11343-сомониро ғайриқонунӣ ба муомилот баровардааст.
Зимнан зикр мегардад, ки нисбати далели мазкур парвандаи ҷиноятӣ оғоз гардида, тафтишот дар ин самт идома дорад.
Қобили зикр аст, ки дар вохӯрӣ бо журналистон рӯзи 31 июл прокурори генералии Тоҷикистон Юсуф Раҳмон дар мавриди ин масъала изҳор намуда буд, ки давоми 6 моҳи соли ҷорӣ барои муомилоти ғайриқонунӣ бо асъори хориҷӣ 70 парвандаи ҷиноӣ боз шудааст.
