Созмони «Ҳаракати исломии Ӯзбекистон» (ҲИӮ) навори ивдеоие интишор намуд, ки дар он дар бораи барҳам дода шудани ҳаракат ва ба як қисмате аз созмони ифротгарои «Давлати исломӣ» табдил ёфтани он хабар дод.
Бино ба иттилои
Радиои Озодӣ
, рӯзи 6 август раҳбари ҲИӮ Усмон Ғозӣ ва мусаллаҳони ӯ ба забони арабӣ ба ба гурӯҳи ситезаҷӯи “Давлати Исломӣ” ва раҳбари он Абӯбакри Бағдодӣ байъат кардаанд.
Сухангӯи навор бархе аз қисматҳои ин савгандро тарҷума мекунад ва мегӯяд, “аз ин ба баъд мо танҳо ҳаракат нестем, балки давлат ҳастем”. Вай илова мекунад, ки аъзои ҲИӮ аз ин ба баъд бояд афроди “вилояти Хуросони “Давлати исломӣ” номида шаванд.
Сипас дар навор Ғозӣ тасмими худро шарҳ медиҳад: “Худоро шукр, бо хости Аллоҳ мо ба хилофате, ки воқеан ба ислом таъзим кард, байъат кардем ва акнун бахше аз он ҳастем.”
Гуфта мешавад, рӯшан нест ин навор кай дар куҷо бардошта шудааст. Гузоришҳо дар бораи афзоиши тамоюли ҲИӮ ба гурӯҳи “Давлати исломӣ” ҳафтаҳо ба ин сӯ пахш мешуд.
ҲИӮ, ки дар Афғонистон ва Покистоне фаъолият дорад, асосан аз марду занони Узбакистон ва кишварҳои дигари Шӯравии собиқ иборат аст. Аз ҷониби Департаменти давлатии ИМА, ҳукуматҳои Русия ва кишварҳои Осиёи Марказӣ ин ҳаракат як созмони террористӣ унвон мешавад. Маълум гаштааст, ки он бо шабакаи ал-Қоида ва ҷунбиши Толибон ҳамкорӣ мекунад.
