Дар доираи сафари прокурори генералии Тоҷикистон Раҳмон Юсуф Аҳмадзод ба ҷаласаҳои Шӯрои ҳамоҳангсозии прокуророни генералии кишварҳои аъзои Иттиҳоди Давлатҳои Мустақил ва Созмони Ҳамкории Шанхай дар Остона, вохӯрии дуҷонибаи прокурори генералии Тоҷикистон бо прокурори генералии Қирғизистон Индира Ҷолдубаева баргузор гашт.
Бино ба иттилои сомонаи расмии Прокураураи генералии ҶТ, дар рафти вохӯрӣ, масъалаҳои мусоидат ба раванди делимитатсия ва демаркатсияи сарҳади давлатӣ, пешгирии ҳодисаҳо ва муноқишаҳои аҳолии наздисарҳадӣ, дақиқан ва объективона пеш бурдани тафтишоти ҳодисаҳои бавуҷудомада, аз ҷумла созмон додани гуруҳҳои муштараки тафтишотӣ, бозпас додани маҳбусон – шаҳрвандони якдигар барои адои минбаъдаи ҷазо дар қаламрави ватани хеш ва ғайра баррасӣгардиданд.
Гуфта мешавад, дар натиҷа бо мақсади амалан татбиқ намудани масъалаҳои баррасишуда, байни Прокуратураи генералии Тоҷикистон ва Прокуратураи генералии Қирғизистон оид ба расонидани ёрии ҳуқуқӣ ва ҳамкорӣ Созишнома ба имзо расонида шуд.
