Дар робита ба ҳодисаҳое, ки субҳи имрӯз дар пойтахти Тоҷикистон ва шаҳри Ваҳдат ба вуқӯъ пайвастанду тибқи маълумоти пешакӣ дар ҷараёни онҳо 7 нафар кормандони милиса ва 2 нафар аз ҳамлагарон ҳалок шудаанд, тадбирҳои пурзӯи амниятӣ андешида шуданд.
Тавре ба «Азия-Плюс» як манбаъ аз сохторҳои қудратӣ дар ин робита иттилоъ дод, тамоми автомашинаҳое, ки ба шаҳри Душанбе ворид ё хориҷ мешаванд, аз ҷониби намояндагони мусаллаҳи сохторҳои интизомӣ дақиқан мавриди тафтишу кофтуков қарор мегиранд. Кӯчаҳои шаҳрҳои Душанбе ва Ваҳдатро дастаҳои кормандони милиса посбонӣ мекунанд.
Субҳи имрӯз ҳамаи кормандони мақомоти ҳифзи ҳуқуқи кишвар таъҷилан ба кор даъват шуда, мавзеъҳои хилвати Душанберо аз назар мегузаронанд.
То ин замон ВКД Тоҷикистон ба ҷуз интишори маълумоти расмӣ дар бораи ҳодисаи ҳамла ба Шуъбаи ВКД дар шаҳри Ваҳдат дар сомонаи вазорат, дигар оид ба ин ҳодисаҳо хомӯширо ихтиёр намудааст.
Дар ҳамин ҳол, бино ба маълумоти
хабаргузории «Озодагон»
, Маҳмадсаид Бобоҷонов, падари Умар Бобоҷонов гуфтааст, наздикони онҳо ба ин ҳамла ҳеч рабте надоранд: «Ҳамаи хешу таборон дар назди ман дар беморхона қарор доранд. Писарам ҳоло ҳам дар ҳолати беҳушӣ аст».
