Президенти Тоҷикистон Эмомалӣ Раҳмон аз аҳолии мамлакат даъват кард, ки дар дар шароити торафт мураккабу печида гардидани авзои сиёсии ҷаҳон ҳушёриву зиракиро аз даст надиҳанд.
Бино ба иттилои хадамоти матбуоти сарвари давлат, зимни суханронии имрӯза дар маросими ифтитоҳи Мактаби Президентӣ барои хонандагони болаёқат дар ноҳияи Ҳисор Эмомалӣ Раҳмон аз ҳар як тоҷикистонӣ даъват кард, ки зирак буда, ба ҳар гуна дасисаи бадхоҳони миллати тоҷик фирефта нагарданд.
Президент бар ин назар аст, ки дар чунин замони мушкил ҳар як шаҳрванди кишвар бояд манфиатҳои милливу давлатиро аз тамоми манфиатҳои дигар боло гузорад.
«Мо бояд сарзамини аҷдодии худро сидқан дӯст дорем, сулҳу оромӣ, суботи сиёсӣ ва ваҳдати миллиамонро содиқона ҳифзу эҳтиёт кунем ва саъю талоши фарзандонаи худро барои дар арсаи байналмилалӣ боз ҳам баланд бардоштани нуфузу эътибори Тоҷикистони маҳбубамон дареғ надорем», – таъкид дошт сарвари давлат.
