Дар гузориши нави Иттифоқи байнулмилалии алоқаи электрикӣ
«Вазъи алоқаи хатти васеъ»»
гуфта мешавад, ҳамагӣ 17,5%-и аҳолии Тоҷикистон ба шабакаи ҷаҳонии Интернет дастрасӣ доранд.
Дар рейтинги аз ҷониби коршиносони ин Иттифоқ таҳияшуда оид ба сатҳи истифодаи Интернет миёни 191 кишвари ҷаҳон Тоҷикистон зинаи 141-умро касб кардааст. Пешсафони ин рейтинг кишварҳои Исландия (сатҳи фарогирии аҳолӣ – 98,2%), Норвегия (96,3%) ва Дания (96%) мебошанд.
Дар минтақаи Осиёи Марказӣ аз ҳама бештар дар Қазоқистон (54%) аз Интернет истифода мекунанд, ки дар рейтинг ба зинаи 73-юм гузошта шудааст. Ӯзбекистон дар мақоми 93-юм (43,6%), Қирғизистон – зинаи 118-ум (28,3%) ва Туркманистон – мақоми 153-юм (12,2%) қарор доранд. Русия зинаи 44-умро ишғол намуда, сатҳи дастрасии аҳолиаш ба шабакаи Интернет 70,5%-ро ташкил медиҳад.
Сатҳи аз ҳама пасттарини дастрасӣ ба Интернет дар кишварҳо Африқо ба қайд гирифта шудааст, ки ба гунаи мисол дар Гвинея он ба камтар аз 2%-и аҳолӣ дастрас аст.
Дар гузориши Иттифоқи байнулмилалии алоқаи электрикӣ таъкид мешавад, ки то ҳол ҳудуди 4 млрд. нафар аҳолии сайёра ба шабакаи Интернет дастрасӣ надошта, аз истифодаи имконоту афзалиятҳои бузурги иқтисодӣ ва иҷтимоии ин шабака маҳруманд.
Муаллифони гузориш қайд мекунанд, ки айни замон 43% аз аҳолии ҷаҳон, ки ба 3,2 млрд нафар баробар аст, имкони дастрасӣ ба шабакаи Интернетро дошта, дар кишварҳои дар ҳоли рушд қарордошта ин танҳо барои 35%-и аҳолӣ дастрас аст ва дар 48 кишвари аз ҳама камтар рушдёфта ҳудудуи 90%-и аҳолӣ имкон надоранд, ки аз шабакаи Интернет истифода кунанд.
Гуфта мешавад, имрӯз дар 79 кишвари дунё беш аз нисфи аҳолӣ имкон доранд, ки ба шабакаи Интрнет пайваст шаванд.
