Президенти Тоҷикистон Эмомалӣ Раҳмон мардуми кишвар ва ҳамватанони бурунмарзиро бо фарорасии иди саиди Қурбон табрик намуд.
Дар
паёми телевизионӣ ба муносибати Иди Қурбон
, сарвари давлат қайд кард, ки ин ид аз ҷумлаи арзишҳои муқаддаси суннатии мардуми мусулмони мо буда, одамонро ба корҳои хайру саховат ва амалҳои нек ҳидоят менамояд ва дар қалби ҳар фарди мусулмон ниҳоли меҳру муҳаббатро нисбат ба ҳамдигар решадор месозад.
«Ҷавҳари асосии Иди Қурбонро талқини арзишҳои инсонӣ, поси хотири гузаштагон, аёдати пайвандону хешу таборон, изҳори ҳамдардӣ ба азодорон ва хайру эҳсон ба ятимону маъюбон, дармондагону ниёзмандон ва оилаҳои камбизоат ташкил медиҳанд», – иброз медорад президенти мамлакат.
Сарвари давлат ба масъалаи сарфаи воситаҳои буҷети оилавӣ таваҷҷуҳ зоҳир намуда, аз тоҷикистониён даъват ба амал овард, ки аз исрофкорӣ худдорӣ варзанд ва дар хароҷот ба меъёрҳо риоя намоянд.
«Бузургони мо дар ин бора панду андарзҳои зиёде гуфта, исрофкориро мазаммат намудаанд. Масалан, Унсурмаолии Кайковус дар «Қобуснома» таъкид менамояд, ки «харҷ ба андозаи дахл бояд бошад, то ниёзманд набошӣ», яъне қаноат пеша кардан ва дороии худро барои беҳбудии оилаи худ сарф кардан асоси пешравӣ ва баланд гардидани дараҷаи зиндагии ҳар сокини кишвар мебошад», – мисол овард президент дар ин робита.
Ӯ дар ин рӯзи муборак бо шукргузорӣ аз амну амонии мамлакат ва давлату давлатдории миллӣ бо нияти саодату некбахтии ҳар як сокини Тоҷикистони азиз орзу намуд, ки бигзор ин сарзамини сарсабзу ободи кишвар ва мардуми шарифу сарбаланди он аз ҳама газанду офатҳо дар амон бошанд.
«Фарорасии Иди саиди қурбонро бори дигар ба ҳамаи шумо, ҳамватанони азиз ва кулли ҳамватанони бурунмарзиамон табрик гуфта, бароятон хонаободиву сарбаландӣ, тандурустиву фарохдастӣ ва саодати рӯзгор мехоҳам», – зикр мегардад дар паёми телевизонӣ.
