Дар чаҳорчӯби татбиқи лоиҳаи «Амаланамоии назорати сарҳадӣ дар Тоҷикистон – бартараф кардани гардиши ғайриқонунии маводи ядроӣ ва радиоактивӣ» дидбонгоҳҳои гумрукии «Панҷи-поён», «Дӯстӣ», «Фотеҳобод», «Нов», «Конибодом», «Пахтобод» бо таҷҳизоти техникӣ муҷҷаҳаз гардонида шуданд.
Бино ба иттилои дафтари матбуоти Хадамоти гумруки назди ҳукумати ҶТ, инчунин Донишкадаи такмили ихтисоси Хадамоти гумрук бо дастгоҳҳои назорати радиатсионӣ таъмин гардида,ҳамчунин 40 – пейҷер барои пешгирӣ кардани қочоқи ғайриқонунии маводи радиоактивӣ ва 13 дозиметр-радиометр барои маҳдудкунии онҳо дастрас гардидааст.
Гуфта мешавад, арзиши умумии лоиҳа бо назардошти дастраскунӣ, интиқол (ҳамлу нақл), ҷо ба ҷокунӣ, бакорандозию танзим ва омӯзиш 1,5 миллион Евроро ташкил медиҳад.
Зимнан зикр мегардад, ки дар солҳои охир терроризм бо истифодаи маводи ядроӣ ва радиатсионӣ нооромии бештарро ба амал овардааст. Террористон ҳамчунин метавонанд аз «бомбаҳои чиркин» истифода баранд, яъне бомбаҳое, ки аз партовҳо (мавод)-и дорои радиактивҳои баланд иборатанд ва имкон дорад тавассути истифодаи онҳо мавзеъҳои калон заҳролуд гарданд.
