Раиси Бонки милии Тоҷикистон Ҷамшед Нурмаҳмадзода бар ин назар аст, ки қабули қонуни ҶТ «Дар бораи Асосгузори сулҳу ваҳдати миллӣ – Пешвои миллат» барои ҳифзи Истиқлолияти давлатӣ, анъанаи неки давлатдорӣ, муттаҳидии халқ дар атрофи ғояҳои созандаю бунёдкорона ва таҳкими сохтори конститутсионӣ мусоидат мекунад.
Зимни суханронӣ дар ҷаласаи васеъ бо иштироки тамоми воҳидҳои сохторӣ бахшида ба аз ҷониби парлумон қабул шудани ин қонун, Ҷ.Нурмаҳмадзода бахусус «нақши таърихии Президенти Ҷумҳурии Тоҷикистон Эмомалӣ Раҳмон ҳамчун Пешвои миллат дар бунёди давлатдории миллӣ, таъмини сулҳу ваҳдати миллӣ ва таъмини зиндагии пурнишоти мардуми шарифи тоҷик»-ро таъкид намуд.
Раиси БМТ чунин мешуморад, ки «қабули ин қонун дар шароити кунунӣ як амри воқеӣ ва зарурати таърихӣ аст». «Пешвои миллат будан нақш ва рисолати таърихии Эмомали Раҳмон мебошад», – гуфт ӯ.
Ҳайати роҳбарикунанда ва кормандони БМТ пуштибонии амиқи хешро аз қабули қонунн «Дар бораи Асосгузори сулҳу ваҳдати миллӣ – Пешвои миллат» изҳор намуда, нақши таърихии Президенти м амлакат Эмомалӣ Раҳмон ба сифати Пешвои миллат ва бунёдгузори давлати миллӣ дар амри таъмини истиқлолияти воқеии давлатӣ ва ҳастию бақои миллати тоҷикро боиси ифтихори миллат донистанд.
Ёдрас мекунем, ки қонуни қабулшуда «Дар бораи Асосгузори сулҳу ваҳдати миллӣ – Пешвои миллат» ваколати Пешвои миллат, дахолатнопазирии ӯ баъди тарк кардани мансаби президенти Тоҷикистон, таъмини ӯ бо нақлиёт, манзили зист, имтиёзҳои иҷтимоӣ баъди анҷоми муҳлати президентиро муқаррар мекунад.
Мутобиқи меъёрҳои ин қонун, пас аз мансаби президентиро тарк гуфтан Пешвои миллат ҳамчунин барои муроҷиат ба мардуми ҷумҳурӣ, иштирок кардан дар кори чорабиниҳои муҳими давлатӣ ва суханронӣ дар онҳо ҳуқуқ дорад. Ғайр аз ин, дар қонун таъсиси бойгонӣ, китобхона ва осорхонаи Пешвои миллат низ пешбинӣ шудааст.
Барои ҳукми қонунӣ гирифтани қонун, онро бояд палатаи болоии парлумон тасдиқ ва аз ҷониби президент ба имзо расад. Пас аз нашри он дар матбуоти расмӣ қонун мавриди амал қароргирифта шуморида мешавад.
