Рӯзи 3 май дар толори суди ноҳияи Фирдавсии шаҳри Душанбе мурофиаи судӣ нисбати адвокатҳо Бузургмеҳр Ёров ва Нуриддин Маҳкамов оғоз гардид. Сарфи назар аз ваъдаҳои ҳукуматдорон, рӯзноманигорон, намояндагони сафоратхонахои хориҷиву созмонҳои байнулмилалии муқими Тоҷикистон ба мурофиа роҳ дода нашуданд.
Парвандаро суди шаҳри Душанбе баррасӣ мекунад, вале бинобар сабаби таъмири бинои суд, он дар толори суди яке аз ноҳияҳои шаҳр доир мегардад. Мурофиа бо танаффуси якунимсоата бо иштироки хешовандони гумонбаршудагон оғоз гардид.
Ба гуфтаи Ҷамшед Ёров, бародари ӯ Бузургмеҳр тасмим гирифтааст, ки аз хизмати адвокати худ Рустам Ҳакимов даст кашад, чунки бар ин назар аст, ки вақти барои ба Ҳакимов додашуда барои шиносоӣ бо маводи парванда, ки ҳамагӣ 2 рӯзро ташкил медод, кофӣ нест. Ғайр аз ин, Ёров ва Маҳкамов аз раисикунандаи мурофиа дархост намудаанд, ки судя Асомиддин Бобохонзода иваз карда шавад. Пас аз дархости айбдоршавандагон суд ба хонаи машваратӣ хориҷ шуд. Ҷаласаи навбатӣ ба санаи 10 май таъин шуд.
Пас аз мурофиа ҳуқуқшинос Ойниҳол Бобоназарова изҳор дошт, ки рӯзи аввали мурофиа Бузургмеҳр Ёров гуфтааст, ваҷҳу далелҳои ба сифати исботи бегуноҳии ӯ пешниҳодшуда ба маводҳои парванда ҳамроҳ нашуда, ин бори дигар хусусияти сиёсии фармоишӣ доштани парвандаи ҷиноӣ нисбати ӯро собит месозад. «Ӯ таъмини мурофиаи мустақил ва мунсифонаро дархост кард», – афзуд Бобоназарова.
Ёдрас мекунем, ки соли гузашта нисбати Бузургмеҳр Ёров мутобиқи моддаҳои 189 (Барангехтани кинаю адовати миллӣ, нажодӣ, маҳалгароӣ ва ё динӣ); 247 (Қаллобӣ); 307 (Даъвати оммавӣ барои бо роҳи зӯроварӣ тағйир додани сохти конститутсионии ҶТ), 307.1 (Даъвати оммавӣ дар ба амал баровардани фаъолияти экстремистӣ (ифротгароӣ) ва 340 (Сохтакорӣ, тайёр кардан ё ба соҳибияти каси дигар додани ҳуҷҷат, мукофоти давлатӣ, штамп, муҳр ва бланкаҳои қалбакӣ)-и КҶ ҶТ парвандаи ҷиноӣ боз шуда буд.
Бузургмеҳр Ёров 29 сентябри соли гузашта баъди аз ҷониби ӯ таъсис дода шудани Кумитаи ҳимояи аъзои ҳабсшудаи Ҳизби наҳзати исломии Тоҷикистон боздошт шуда буд.
Б.Ёров ҳамчунин шахси бовариноки раиси Ҳизби фаъолияташ дар қаламрави Тоҷикистон мамнӯъи наҳзати исломӣ буд. Баъди як рӯзи изҳороти Б.Ёров оид ба нисбати аъзои ҳабсшудаи ҲНИТ истифода шудани шиканҷа, ӯ ба қаллобӣ муттаҳам ва ба ҳабс гирифта шуд.
