Тоҷикистон ният дорад, ки дар оянда тариқи қаламрави Ӯзбекистон ва Туркманистон нерӯи барқи худро ба Эрон интиқол диҳад.
Бино ба маълумоти Кумитаи давлатии сармоягузорӣ ва идораи амволи давлатии ҷумҳурӣ, маблағгузорӣ ба лоиҳаи хатти баландшиддати интиқоли нерӯи барқи 500кВт Роғун – Регар – Гузар – Қаракӯл – Чорҷӯ – Марв – Машҳад 166,5 млн. доллари ИМА арзёбӣ мешавад.
Аз рӯи хатсайри хатти баландшиддати интиқоли нерӯи барқ метавон ҳадс зад, ки нерӯи барқи ба Эрон содиротмешуда яқинан аз нерӯгоҳи Роғун интиқол хоҳад ёфт, ки айни замон сохтмони ин иншоот идома дорад.
Масофиаи ин хатти интиқоли барқ тақрибан 250 километрро ташкил медиҳад. Қисмате аз ин хат, аз Марви Туркманистон то Машҳади Эрон аллакай вуҷуд дорад. Муҳлати худкифоӣ ё хароҷотбарории лоиҳа танҳо баъди таҳияи лоиҳаи арзёбии фанниву иқтисодии он маълум хоҳад шуд.
Қобили зикр аст, ки айни замон Тоҷикистон имкон дорад, ки дар мавсими тобистон нерӯи барқи зиёдатии худро дар ҳаҷмҳои начандон зиёд ба Афғонистон ва Қирғизистон содирот намояд.
Пас аз амалисозии лоиҳаи минтақавии CASA-1000 Тоҷикистон ният дорад, ки дар мавсими тобистон ҳаҷми интиқоли барқ ба Афғонистонро афзуда, ҳамчунин содироти он ба Покистонро низ ба роҳ монад.
