Мақомоти корҳои дохилии Тоҷикистон нисбати сокини 58-солаи шаҳри Душанбе аз рӯи далелҳои қаллобӣ парвандаи ҷиноӣ боз намуд. Ӯ ҳадди ақал дар се ҳолати фиреби одамон – сокинони Душанбе ва ноҳияи Варзоб гумонбар дониста мешавад.
Дафтари матбуоти ВКД Тоҷикистон дар шарҳи ин маълумот менависад, ӯ бо роҳи фиреб ба боварии шиносҳояш даромада, моҳи майи соли 2013 аз сокини 57-солаи пойтахт 26 ҳазор доллари ИМА гирифта, то ҳол барнагардонидааст.
«Бо ҳамин восита ӯ аз сокини 51-солаи ноҳияи Варзоб – 20 ҳазор ва зани 37-солаи сокини пойтахт – низ боз 20 ҳазор доллари ИМА «қарз гирифта», онҳоро низ то ҳанӯз барнагрдонидааст ва маблағи умумии гӯё қарзи гирифта аз шиносҳояш 66 ҳазор доллари ИМА-ро ташкил медиҳад», – омадааст дар маълумоти ВКД Тоҷикистон.
Зимнан зикр мегардад, ки аз рӯи ин далелҳо парвандаи ҷиноӣ боз шуда, тафтишот дар ин самт идома дорад.
