Кумитаи тафтишоти Русия дар шаҳри Санкт-Петербург иттилоъ медиҳад, ки ду шаҳрванди Тоҷикистон – Фирӯз Шукуров ва Орзу Ризоев ба гумони мусоидат ба фаъолияти террористӣ ба муҳлати ду моҳ ба ҳабси пешакӣ гирифта шудаанд.
Дар
маълумот
зикр мегардад, ки рӯзи 21 июн суди Невскии шаҳри Санкт-Петербург дархости тафтишотро қонеъ намуда, ба ҳабси ду шаҳрванди Тоҷикистон, ки барои мусоидат ба фаъолияти террористӣ гумонбар дониста мешаванд, иҷозат додааст.
Бино ба
иттилои
Радиои Озодӣ, мақомоти интизомии Русия Фирӯз Шукуров ва Орзу Ризоев, шаҳрвандони Тоҷикистонро барои ҷалби сокинон ба сафи гуруҳи “Давлати исломӣ” муттаҳам медонанд. Аз ин афрод адабиёт ва рамзҳои мазҳабӣ дарёфт шудааст.
Ба иттилои манбаъ, Орзу Ризоев қаблан бо як духтари рус издивоҷ карда, шаҳрвандии Русияро низ доштааст, аммо Фирӯз Шукуров қаблан аз қаламрави Русия ихроҷ шуда, маълум нест, аз чӣ тариқ дубора ворид гардидааст.
Гуфта мешавад, нисбати онҳо бар асоси қисми аввали моддаи 205.1-и Кодекси ҷиноии Русия (мусоидат ба фаъолиятҳои террористӣ) таҳқиқот идома дорад ва тибқи ин модда аз 5 то 10 соли зиндон ва ҷарима ба маблағи то 500 ҳазор рубл, муодили беш аз 7 ҳазор доллар ҷазо пешбинӣ шудааст.
