Тағйироту иловаи аз ҷониби ҳукумат пешниҳодшуда ба қонун «Дар бораи хусусигардонии моликияти давлатӣ»-ро имрӯз вакилони палатаи поёнии парлумон комилан ҷонибдорӣ намуданд.
Зимни суханронӣ назди вакилон доир ба ин масъала раиси Кумитаи давлатии сармоягузорӣ ва идораи амволи давлатии ҶТ Қодири Қосим изҳор дошт, ки мутобиқи тағйироти мазкур, баъзе аз иншоооти давлатии зербиноӣ метавонанд муваққатан хусусӣ гардонида шаванд, вале аз шарҳи ҷузъиёти мафҳуми хусусигардонии муваққатӣ худдорӣ варзид.
Ба гуфтаи ӯ, тартибу номгӯй ва шартҳои хусусигардонии муваққатии иншооти давлатӣ ва зербиноиро ҳукумати Тоҷикистон муқаррар мекунад.
Ёдрас мекунем, ки 25 феврали соли 2009 Маҷлиси намояндагони Маҷлиси Олии Тоҷикистон тағйирот ба қонун «Дар бораи хусусигардонии моликияти давлатӣ»-ро маъқул шуморид, ки мутобиқи он иншооти пурра ба давлат мутааллиқ, аз ҷумла КВД «Ширкати алюминии тоҷик» ва ду нерӯгоҳи барқи обии кишвар – нерӯгоҳи амалкунандаи Норак ва нерӯгоҳи то ҳол сохтмонаш нотамоми Роғун хусусӣ гардонида намешаванд.
Дар рӯйхати иншооте, ки набояд хусусӣ гардонида шаванд, ҳамчунин иншооти таъиноти мудофиавӣ ва захираҳои обии ҷумҳурӣ низ ҷой доранд. Он замон раҳбарияти Кумитаи давлатии сармоягузорӣ ва идораи амволи давлатии ҶТ қайд карда буд, ки дигар иншооти боқимонда, аз ҷумла сохтори ширкатҳои монополист аз нав ташкил карда мешаванд.
Дар ҳамин ҳол, қаблан Кумитаи мазкур
иттилоъ дода буд
, ки то охири соли равон тариқи музоядаҳо фурӯхтани бастаи саҳмияҳои беш аз 20 ҷамъиятиҳои саҳҳомӣ, ки ба давлат тааллуқ дорад, дар назар аст.
