Субҳи рӯзи якшанбе дар яке аз манзилҳои навсохти баландошёнаи шаҳри Душанбе лифти он канда шуд, ки дар дохили он занон ва кӯдакони хурдсол қарор доштанд.
Шоҳидони ҳодиса, истиқоматкунандагони хонаи 44/1-и кӯчаи Раҳмон Набив ба «Азия-Плюс» дар ин робита гуфтанд, дар ошёнаи шашуми бино таноб (трос)-и лифт канда шудааст. «Хушбахтона, занону кӯдакони дар дохили он қарордошта, осеби ҷиддӣ надида, танҳо ҷароҳатҳои сабук бардоштанд», – гуфтанд онҳо ва изҳор доштанд, ки шумори дақиқи ҷароҳатбардоштагон ба онҳо маълум нест.
Хонаи нуҳошёна бо суроғаи кӯчаи Раҳмон Набиев 44/1 навсохт буда, чанд сол пеш ба истифода дода шудааст. Ба қавли сокинони ин хона, онҳо мудом бо лифт ва хатти барқ дар ин бино мушкилӣ доштаанд.
Дигар ҷузъиёти ин ҳодиса айни замон маълум нест.
