Шаби 12 июни соли равон дар шаҳри Иркутск донишҷӯи соли дуввуми Институти Сибири Шимолии ВКД Россия Саидшоҳ Исломови 20-сола аз Тоҷикистон аз тарафи шахсони номаълум бо зарби корд кушта шуд.
Тавре Сарвар Бахтӣ, котиби матбуотии сафорати Тоҷикистон дар Россия иттилоъ дод, оид ба ин куштор аз ҷониби мақомоти қудратии шаҳри Иркутск парвандаи ҷиноятӣ оғоз гардидааст.
«Шахсони гумонбар дастгир шудаанд ва ҳоло бинобар зарурати тафтишотӣ, номҳои онҳо аз тарафи мақомоти тафтишотӣ ифшо нашудааст», – иброз дошт ӯ.
Зимнан зикр гардид, ки сафорати Тоҷикистон дар Россия дар ҳамбастагӣ бо Намояндагии Вазорати меҳнат, муҳоҷират ва шуғли аҳолии Тоҷикистон дар Россия ва намояндагони диаспораи тоҷик барои фиристодани ҷасади шаҳрванди фавтидаи тоҷик иқдоми лозимаро анҷом дода, ҷасад ба ватан фиристода хоҳад шуд.
