Шабонарӯзи гузашта дар қисмати марказии Тоҷикистон ду далели ҷинояткорӣ бо истифода аз корд ба қайд гирифта шуда, кормандони милитсия ба гумони расонидани зарар ба саломатӣ 3 нафарро боздошт намуданд.
Бино ба иттилои дафтари матбуоти ВКД Тоҷикистон, ба гумони даст доштан дар ин ҳодисаҳо ҷавони 21-солаи сокини шаҳри Ваҳда боздошт шудааст, ки аз ҳиссиёти авбошӣ бо ҷавони 20-солаи сокини ҳамин шаҳр муноқиша намуда, бо корди дар дасташ буда, як маротиба ба шиками ӯ зада, ҷароҳати ҷисмонӣ расонидааст. Дар натиҷа ҷавони ҷабрдида ҷароҳати вазнини ҷисмонӣ бардошта, дар беморхона бистарӣ гардидааст.
Гуфта мешавад, ҳамчунин, дар шаҳри Душанбе низ дар ин рӯз ду ҷавони 19 ва 22-солаи сокинони шаҳри Норак дар гумонбарӣ ба ҷинояти дар боло зикргардида дастгир гардидаанд, ки зимни муноқиша дар назди роҳи оҳани кӯчаи Лермонтови ш.Душанбе бо ҷавонони 19 ва 20-солаи сокинони шаҳри Душанбе ҷавони 19-солаи сокини ш. Норак бо корди дар дасташ буда, ба қисмати шикам ва қафаси синаи ду нафари охирин зарба зада, ҷароҳати ҷисмонӣ расонида, аз ҷои ҳодиса ғайб задааст. Дар натиҷа ҷавонони ҷабрдида ҷароҳати ҷисмонӣ бардошта, дар беморхона бистарӣ шудаанд.
Зимнан зикр мегардад, ки аз рӯи ин ҳодисаҳо парвандаҳои ҷиноятӣ оғоз гардида, тафтишот идома дорад.
