Кормандони Агентии назорати давлатии молиявӣ ва мубориза бо коррупсияи ҷумҳурӣ корманди Маркази санитарию эпидемиологии ноҳияи Восеъро ба гумони қаллобӣ боздошт намуданд.
Бино ба иттилои маркази матбуоти Агентӣ, корманди ин марказ Абдурасул Холматов тибқи маслиҳати пешакӣ бо корманди бемористони ноҳия Иброҳим Валиев ба боварии шаҳрванд «М» даромада, ба ӯ ваъда медиҳанд, ки барои дохил шуданаш ба коллеҷи тиббии ноҳия мусоидат мекунанд ва сипас аз ӯ ба сифати мукофотпулӣ 2,1 ҳазор доллари ИМА-ро гирифта, вале ваъдаашонро иҷро намекунанд.
Гузашта аз ин, тибқи маълуомти Агентӣ, онҳо аз шаҳрванд «М» боз 300 доллари ИМА маблағи иловагӣ талаб намуда, зимни гирифтани ин миқдор маблағ Иброҳим Валиев дар қаламрави бемористон боздошт мешавад.
Зимнан зикр мегардад, ки аз рӯи ин далел нисбати А.Холматов ва И.Валиев парвандаи ҷиноӣ боз шуда, тафтишот дар ин самт идома дорад.
