Додгоҳи ҳарбии минтақаи Қафқози шимолӣ Зафар Холов, зодаи Тоҷикистон, сержанти калони Қувваҳои мусаллаҳи Русияро дар қасди ҷалби ҳамкораш-капитани артиши Русия ба сафи ДИИШ гунаҳкор донист.
Бино ба иттилои хабаргузории «Озодагон» бо такя ба маълумоти расонаҳои Русия, Зафар Холов, ки дар артиши ин кишвар тариқи шартнома кор мекард, моҳи декабри соли 2015 боздошт гардидааст: “Алайҳи ӯ бо моддаи 205.1-и Кодекси ҷиноятӣ, барои мусоидат ба фаъолияти террористӣ парванда боз шуда, баррасии он 14 декабр хотима ёфт”.
Ба иттилои мақомоти тафтишотӣ, Зафар Холов, ки вазифаи фармондеҳи отделенияи қисми ҳарбӣ дар Владикавказро бар ӯҳда доштааст, замони суҳбат бо яке аз ҳамкоронаш, муттахасиси зиддимушакӣ, мехостааст ӯро бо роҳи тағйири ақида ва ё таъсири психологӣ ба ДИИШ ҷалб намояд: “Холов дар додгоҳ гуфтааст, ҳадафаш бовар кунондани ҳамкораш барои рафтан ба Сурия набуд. Ман ҳеч гоҳ радикал набудам. Ин танҳо гуфтугӯи нодуруст буд”.
Манбаъ гуфтааст, Холов дар артиши Русия 15 сол собиқаи корӣ дошта, дар ин муддат ҳеч гоҳ ба ҷавобгарӣ кашида нашудаст: “Дар як қатор амалиёти зиддитеррористӣ дар Қафқози Шимолӣ иштирок намудааст ва аз ҷониби Вазорати мудофиаи ин кишвар бо медал “Барои хизмати тулонӣ” сарфароз гардонда шудааст. Ӯ ду фарзанди 5 ва 2-сола доштааст”.
Зикр мегардад, ки додгоҳ бо назардошти ҳолатҳои сабуккунанда Зафар Холовро ба панҷ соли зиндони низомаш умумӣ маҳкум карда, рутбаи ҳарбияшро бекор намудааст.
