Кумитаи ҳолатҳои фавқулода ва мудофиаи граждании назди ҳукумати ҶТ ба маълумоти шаҳрвандон ва меҳмонони ҷумҳурӣ мерасонад, ки то 25 январ дар қаламрави кишвар поинравии ҳарорат ва борони ба барф табдилёбанда дар назар аст.
Дар ин рӯзҳо ба ноқилҳои барқ ва дарахтон часпидани барфи тар ва дар роҳҳои куҳӣ ғарами барф ва яхбандӣ пешгӯӣ шуда, осеби хатҳои интиқоли барқ ва афтидани дарахтон аз шамоли сахт аз эҳтимол дур нест.
Дар ин робита Кумита шаҳрвандон ва меҳмонони кишварро огоҳ мекунад, ки бештар ба чораҳои амнияти шахсӣ таваҷҷуҳ намуда, аз дорандагони мошинҳои шахсӣ даъват карда мешавад, ки бе зарурат аз онҳо истифода накунанд.
Ҳамчунин аз ронандагон мувофиқи имконият худдорӣ аз сафар тариқи роҳҳои кӯҳистон ва аз сокинон мавқуф гузоштани корҳои кишоварзӣ, ҳезумҷамъкунӣ ва шикор дар мавзеи кӯҳистон дархост мешавад.
Бинобар сабаби тағйирёбии ҳарорат дар бому бомгӯшаҳои биноҳо яхпора ва шушаҳо овезон шуда, зери лабгӯшаи боми хонаҳо, ки шӯшаҳо овезонанд, истодан лозим нест ва дар ин мавридҳо ба рафтори кӯдакон ҷиддан диққат додан зарур аст.
"Бачаҳо ва пиронсолон ба назорати махсус ниёз доранд ва онҳо набояд бе саробон гузошта шаванд. Ҳамчунин зарур аст қоидаҳои бехатарии сӯхтор ҳангоми истифодаи таҷҳизоти гармидиҳанда ҷиддан риоя шаванд. Бе зарурат бегоҳиву шабонгаҳон ба кӯча набароянд", – тавсия медиҳад Кумита.
Ба роҳбарони корхонаву созмонҳо тавсия дода мешавад, ки барои роҳ надодан ба ҳодисаҳои нохуш ва ҳолатҳои фавқулодда тадбирҳои саривақтӣ ва муасссир биандешанд.
